Feeds:
Posts
ಟಿಪ್ಪಣಿಗಳು

Archive for ಜನವರಿ, 2009

‘ಬೋರು’ ಇದು ‘ಬೇಜಾರು’  ಪದದ ತದ್ಭವರೂಪವಾಗಿರಬಹುದಾ?
ಹಾಗಂತ ಒಂದು ಪ್ರಶ್ನೆ  ತುಂಬಾ ಬೋರಾಗುತ್ತಿದ್ದಾಗ ಮನಸಿನಲ್ಲಿ  ಮೂಡಿತು! ಮನೆಯಲ್ಲಿ  ಏನೂ ಕೆಲಸವಿರಲಿಲ್ಲ. ಏನಾದ್ರು ಬರೆಯಬೇಕು ಅನ್ನಿಸುತ್ತಿತ್ತು. ಆದರೂ ಬರೆಯಲು ಬೋರು! ಆ ಬೋರನ್ನು ಕಳೆಯಲಿಕ್ಕಾಗಿಯೇ ಬರೆಯುತ್ತಿದ್ದೇನೆ!

‘ತುಂಬಾ ಬೋರ್ ಆಗ್ತಿತ್ತು ಕಣೋ ಅದ್ಕೆ ಕಾಲ್ ಮಾಡಿದೆ…’ಹಾಗಂತ ಗೆಳತಿ ಹೇಳುತ್ತಿರುತ್ತಾಳೆ.
ನಿನಗೆ ಬೋರ್ ಆಗಲಿಕ್ಕು, ನನಗೆ ಕಾಲ್ ಮಾಡ್ಲಿಕ್ಕು  ಏನು ಸಂಬಂಧ ಮಾರಾಯಿತಿ ಅಂದರೆ…
ಏ ಸುಮ್ನಿರೋ ತಲೆಹರಟೆ ಮಾಡಬೇಡ ಅನ್ನುತ್ತಾಳೆ!

ಅಲ್ಲಿಂದಲೇ ನಮ್ಮಿಬ್ಬರ ಹರಟೆ ಆರಂಭವಾಗುತ್ತದೆ. ಅವಳು ಫೋನ್ ಇಡುವಾಗ ಗಂಟೆಗಳೇ ಕಳೆದಿರುತ್ತದೆ. ಏನು ಹರಟುತ್ತಿದ್ದೇವೆ? ಏಕೆ ಹರಟುತ್ತಿದ್ದೇವೆ? ಈ ಹರಟೆಯಿಂದ ನಮ್ಮಿಬ್ಬರಿಗೂ ಏನು ಪ್ರಯೋಜನ…ಇತ್ಯಾದಿ ಪ್ರಶ್ನೆಗಳನ್ನು ನಾವಿಬ್ಬರೂ ನಮ್ಮೊಳಗೆ ಕೇಳಿಕೊಂಡಿಲ್ಲ. ಆದ್ರೂ, ಅವಳು ನನಗೆ ಕಾಲ್ ಮಾಡಿದ್ರೆ ಅವಳ ಬೋರ್ ನಿವಾರಣೆಯಾಗತ್ತಾ? ನಾನೇನು ‘ಬೋರ್’ ನಿವಾರಿಸುವಾ ಔಷಯಾ? ಅನ್ನಿಸತ್ತೆ ಎಷ್ಟೋ ಸಲ.

‘ಯಾಕೋ ತುಂಬಾ ಬೇಜಾರಾಗ್ತಾ ಇದೆ ಕಣೆ, ಅದ್ಕೆ ಸುಮ್ನೆ ಫೋನ್ ಮಾಡಿದೆ…’ಅಂತಾ ನಾನು ಗೆಳತಿಗೆ ಹೇಳುವಾಗ, ಅವಳಲ್ಲೂ ನನ್ನೊಳಗಿನ ಪ್ರಶ್ನೆಯೇ ಉದ್ಭವಿಸಬಹುದಾ? ಒಮ್ಮೆ ಉದ್ಭವಿಸಿದರೂ, ಆ ಪ್ರಶ್ನೆಯನ್ನು ನನ್ನ ಹತ್ತಿರ ಕೇಳುವ ಧೈರ್ಯ ಅವಳಲ್ಲಿ  ಇಲ್ಲ ಅನ್ನಿಸತ್ತೆ! ಹಾಗಾಗಿಯೇ ಈವರೆಗೆ ನನ್ನ ಬಳಿ ಅವಳು ಆ ಪ್ರಶ್ನೆಯನ್ನು ಕೇಳಿಲ್ಲ!

ಒಮ್ಮೆ ಅಂತಹದ್ದೊಂದು ಪ್ರಶ್ನೆ ಕೇಳಿಕೊಂಡರೆ, ಆ ಪ್ರಶ್ನೆಯ ಮೇಲೇ ಹರಟಲು ಶುರುವಿಡುತ್ತೇವೆ. ಹಾಗೆ ಶುರುವಾದ ಹರಟೆ ಅದೆಲ್ಲಿಗೋ ಹೋಗಿ ನಿಂತಿರತ್ತೆ. ಪ್ರಶ್ನೆಗೆ ಉತ್ತರ ಮಾತ್ರ ಸಿಕ್ಕಿರುವುದಿಲ್ಲ!
ಇನ್ನೊಂದು ದಿನ  ಮತ್ತದೇ ಪ್ರಶ್ನೆಯನ್ನು ಮುಂದಿಟ್ಟುಕೊಂಡು ಫೋನಿನಲ್ಲಿ  ನಮ್ಮಿಬ್ಬರ ಹರಟೆ ಆರಂಭವಾಗತ್ತೆ…ಏ ಮಾರಾಯ ನಿನ್ನ ತಲೆಹರಟೆ ಪ್ರಶ್ನೆಯಿಂದ ಈ ತಿಂಗಳು ನನ್ನ  ಫೋನ್ ಬಿಲ್ಲು ಎಷ್ಟು  ಬಂದಿದೆ ನೋಡು…ಅಂತಾ ಅವಳು ತಿಂಗಳ ಕೊನೆಯಲ್ಲಿ ಎಳೆಯುವ ರಾಗವೇ ನಮ್ಮ ಪ್ರಶ್ನೆಗೆ ಸಿಕ್ಕ ಉತ್ತರ!

‘ಥೂ, ಇದೆಂಥ ಬರಹ ಮಾರಾಯಾ ಬರೀ ಬೋರು’ ಹಾಗಂತ ನೀವು ನನ್ನನ್ನು ಬೈದುಕೊಳ್ಳಲು ಶುರುವಿಟ್ಟಿರಬಹುದು…

ಅಲ್ಲಾ  ಇಷ್ಟು  ಹೊತ್ತು ಗೆಳತಿಯ ಬೋರು ನಿವಾರಿಸಿದ ನಾನು, ನಿಮಗೆ ಬೋರು ಬರಿಸುವ ವ್ಯಕ್ತಿಯಾಗಿಬಿಟ್ಟೆನಾ?
ಬೋರು ನಿವಾರಿಸುವ ಸಾಮರ್ಥ್ಯ ನನ್ನಲ್ಲಿ ಇದೆ ಅಂತಾ ನನ್ನೊಳಗೆ ನಾನು ಇಷ್ಟು ಹೊತ್ತಿನವರೆಗೆ ಬೀಗುತ್ತಿದ್ದೆ. ಆದರೆ ಈಗ…? ಇಂಗ್ಲಿಷ್ ಮೆಡಿಸಿನ್‌ಗೆ ಒಂದು ಕಾಯಿಲೆ ನಿವಾರಿಸುವ ಶಕ್ತಿ ಜತೆಗೆ, ಇನ್ನೊಂದು  ಕಾಯಿಲೆ ಹುಟ್ಟುಹಾಕುವ ಸಾಮರ್ಥ್ಯವೂ ಇರತ್ತಂತೆ. ನಾನು ಒಂತರಹ ಹಾಗೇ ಇರಬೇಕು!
ಅಂದಹಾಗೆ, ಈ ಬೋರ್ ದೇಹದ ಯಾವ ಭಾಗದಿಂದ ಹುಟ್ಟಬಹುದು? ಈ ಬೋರಿನ ಅಪ್ಪ, ಅಮ್ಮ ಯಾರಿರಬಹುದು?

ಈ ಪ್ರಶ್ನೆಯನ್ನು ಬೋರಿನ ಸಮೀಪವೇ ಕೇಳಿಬಿಡಬೇಕು ಅಂತಾ ಹುಮ್ಮಸ್ಸಿನಿಂದ ಸಜ್ಜಾದೆ. ಬರೆಯುವುದನ್ನೂ ನಿಲ್ಲಿಸಿ, ಪ್ರಶ್ನೆ ಕೇಳಲಿಕ್ಕೋಸ್ಕರ ಬೋರಿನ ಬಳಿ ಓಡಿ ಹೋದೆ.

ಇವತ್ತ್ಯಾಕೋ ತುಂಬಾ ಬೋರ್ ಆಗುತ್ತಿದೆ. ನಿನ್ನ ಪ್ರಶ್ನೆಗೆ ನಾಳೆ ಉತ್ತರ ಕೊಡುತ್ತೇನೆ…ಅಂದುಬಿಡ್ತು ಬೋರು!!! ಬೋರ್‌ನ್ನೂ ‘ಬೋರು’ ಕಾಡುತ್ತದೆ ಅಂದಮೇಲೆ ನನ್ನ ಬರಹ ನಿಮಗೆ ಬೋರ್ ಬರಿಸಿರುವುದರಲ್ಲಿ ಅಚ್ಚರಿಯೇನಿಲ್ಲ ಬಿಡಿ.

“ ‘ಬೋರು’ ಇದು ‘ಬೇಜಾರು’  ಪದದ ತದ್ಭವರೂಪ ಅಂದಮೇಲೆ, ಬೇಜಾರು, ಬೋರಿನ ತತ್ಸಮ ರೂಪವಾಗಿರಲೇ ಬೇಕು ಅಲ್ವಾ? ಅಲ್ಲಿಗೆ ಬೋರು, ಬೇಜಾರುಗಳ ನಡುವೆ ನಿಕಟವಾದ ಸಂಬಂಧವಿದೆ ಎಂಬುದು ಖಚಿತ” ಹಾಗಂತ ಶುರುವಾಗುವ ಸೈಕಾಲಜಿ, ಲಾಜಿಕ್ಕಿನ ಪಾಠಗಳು ಅಂದ್ರೆ ನನಗೆ ರೇಜಿಗೆ. ಬೋರು, ಬೇಜಾರು ಇವೆರಡರಿಂದ ‘ರೇಜಿಗೆ’ ಅನ್ನುವ ಮತ್ತೊಂದು ಪದದ ಉದ್ಭವವಾಯಿತು…ಹೀಗೇ ಮುಂದುವರಿದರೆ ಪುಟ್ಟದೊಂದು ಪದಕೋಶದ ಜನನವೂ ಆಗಬಹುದು!

ಪದಕೋಶ, ವ್ಯಾಕರಣ, ಸಮಾಸ … ಹೈಸ್ಕೂಲಿನಲ್ಲಿ  ಓದಿದ ಇಂಥ  ಪದಗಳನ್ನು ಚಿತ್ರಮಂದಿರದಲ್ಲಿ ಕುಳಿತು ಕೇಳಿದರೂ ನನ್ನ ಮನಸ್ಸಿಗೊಮ್ಮೆ ಬೋರ್ ಅನ್ನಿಸುತ್ತದೆ. ಆ ಪಾಠವನ್ನು ಬೋಸುತ್ತಿದ್ದ  ಎಸ್.ಆರ್.ಭಟ್ಟರ ಮೇಲೆ ವಿಪರೀತ ಸಿಟ್ಟು  ಬರುತ್ತದೆ!

ಹೌದು, ನನ್ನ ಈ ಹರಟೆ ಗೆಳತಿಯ ತಲೆಹರಟೆಗಿಂತ ಅತಿಯಾಗುತ್ತಿದೆ. ಗೆಳತಿ ಫೋನ್ ಬಿಲ್ಲು  ಹೆಚ್ಚು  ಬರತ್ತೆ ಅಂತಾ ನೆನಪಾದಾಗಲಾದರೂ ಫೋನ್ ಇಡುತ್ತಾಳೆ. ಹಾಗಂತ ನನ್ನ  ಬರಹಕ್ಕೇನೂ ಯಾವುದೇ ಬಿಲ್ ಇಲ್ಲ. ಆದರೂ ನಿಮ್ಮ  ಮೇಲಿನ ಕನಿಕರದಿಂದ ಇಲ್ಲಿಗೆ ನಿಲ್ಲಿಸಿಬಿಡುತ್ತೇನೆ!

ಅಂದಹಾಗೆ ಈ ಬೋರಿನ ಅಪ್ಪ, ಅಮ್ಮ ನಿಮಗೇನಾದ್ರೂ ಸಿಕ್ಕಿದರೆ  ದಯವಿಟ್ಟು  ನಂಗೆ ತಿಳಿಸಿ. ಅವರ ಹತ್ತಿರ ನಾನು ಸ್ವಲ್ಪ ಖುದ್ದಾಗಿ ಮಾತನಾಡಬೇಕಿದೆ. ಅವರ ಬಳಿ ಮಾತಾಡಿದರೆ ಮತ್ತೆ ‘ಬೋರ್’ ಅಂತಾ ಇವ ಕೊರೆತ ಶುರು ಮಾಡುತ್ತಾನೆ ಅಂದ್ಕೊಂಡು ತಿಳಿಸದೇ ಇರಬೇಡಿ ಪ್ಲೀಸ್…

Advertisements

Read Full Post »