ಬದುಕೆಂದರೆ ಹಾಗೆ…

ಹಾಗಿದ್ದರೆ ಹೀಗಿರಬೇಕಿತ್ತು
ಹೀಗಿದ್ದರೆ ಹಾಗೆ ಚೆನ್ನಾಗಿತ್ತು
ಬದುಕೆಂದರೆ ಹಾಗೆ
ಇರುವುದ ಬಿಟ್ಟು ಇಲ್ಲದಿರುವುದರ ತುಡಿತ
ಬೆಂಕಿಯೊಳಗೆ ಕೈಯಿಟ್ಟು ಸುಟ್ಟುಕೊಳ್ಳುವ ತವಕ

ನನ್ನೊಳಗೆ ನಾನು ಕೆಟ್ಟವನು
ಬೇರೆಯವರಿಗೆ ಒಳ್ಳೆಯವನು
ಬೇರೆಯವರೊಳಗೆ ನಾ ನೀಚ
ನನ್ನೊಳಗೆ ನಾ ಉತ್ತಮನು
ಬದುಕೆಂದರೆ ಹಾಗೆ

ಗೊತ್ತಿದ್ದು ಗೊತ್ತಿಲ್ಲದಂತಿರಬೇಕು
ಕಂಡು ಕಾಣದಂತೆ ನಟಿಸಬೇಕು
ಬದುಕೆಂದರೆ ಹಾಗೆ
ಇದೊಂದು ನಾಟಕ ರಂಗ
ಇಲ್ಲಿ ನಾವೆಲ್ಲ ಕಲಾವಿದರು

ಇಲ್ಲಿ ಯಾವುದಕ್ಕೂ ಬೆಲೆಯಿಲ್ಲ
ಯಾರೂ ಶಾಶ್ವತರಲ್ಲ
ಎಲ್ಲರೂ ಹಾಗೆ ಬಂದು
ಹೀಗೆ ಹೋಗುವವರು
ಬದುಕೆಂದರೆ ಹಾಗೆ

ಯಾರಿಗೂ ಯಾರೂ ಅನಿವಾರ್ಯವಲ್ಲ
ಬದುಕಿಗೂ ಯಾವುದೂ ಅನಿವಾರ್ಯವಲ್ಲ
ಬದುಕೆಂದರೆ ಹಾಗೆ
ಹಾಗೆ ಬೇಕಾದರೂ ಬದುಕಬಹುದು
ಹೀಗೇ ಬೇಕಾದರೂ ಬದುಕಬಹುದು
ಬದುಕೆಂದರೆ ಹಾಗೆ!